سعودی عرب سے پاکستانیوں کی واپسی، ایک دن میں چار پروازیں
سعودی عرب سے پاکستانیوں کی واپسی کا عمل تیز کردیا گیا ہے اور ایک دن میں چار خصوصی پروازیں ریاض اور جدہ سے روانہ ہوئی ہیں۔
پاکستان انٹرنیشنل ایئر لائنز (پی آئی اے) کی تین خصوصی پروازیں منگل کو ریاض سے پشاور اور ملتان کے لیے روانہ ہوگئیں۔
جدہ سے سعودی عربیئن ایئر لائنز کی ایک خصوصی پرواز اسلام آباد گئی ہے جبکہ ملتان جانے والی دو پروازوں میں 140، 140 اور پشاور جانے والی خصوصی پرواز کے ذریعے 250 مسافر سعودی عرب سے پاکستان کے لیے روانہ ہوئے ہیں۔
پشاور جانے والی پرواز سے سولہ پاکستانیوں کی میتیں بھی بھیجی گئی ہیں۔
سفیر پاکستان راجہ اعجاز، ڈپٹی ہیڈ آف مشن اور کمیونٹی ویلفیئر اتاشی مسافروں کو الوداع کہنے کے لیے ائیر پورٹ پر موجود تھے۔
یاد رہے کہ حکومت پاکستان نے کورونا وائرس کی وبا کے باعث سعودی عرب سے واپس آنے کی خواہشمند پاکستانیوں کی وطن واپسی کے لیے خصوصی پروازوں کا سلسلہ شروع کیا ہے۔
اس سلسلے میں یہ جدہ سے آٹھویں پرواز ہے۔ اب تک 1700 افراد کو پاکستان پہنچایا جا چکا ہے جبکہ ریاض سے آٹھ پروازوں کے ذریعے 1434 پاکستانی واپس جا چکے ہیں۔ دامام سے بھی خصوصی پرواز کے ذریعے پاکستانی واپس گئے ہیں۔
پاکستانی دفتر خارجہ کے بیان کے مطابق سعودی عرب میں پاکستان مشن پاکستانی تارکین وطن کے ساتھ مکمل رابطے میں ہے اور لاک ڈاؤن کی پابندیوں کے تناظر میں ان کی ممکنہ معاونت کی جا رہی ہے۔
ریاض میں پاکستان کے سفارتخانے کی درخواست پر پاکستانیوں کی واپسی کے لیے سعودی عرب جانے والی خصوصی پروازوں کی تعداد میں اضافہ کیا جا رہا ہے۔
مشنز نے انتقال کر جانے والے پاکستانیوں کی مقامی تدفین کے 40 کیسز میں بھی معاونت کی ہے جبکہ اب تک 90 میتوں کو وطن واپس لایا گیا ہے۔
بیان میں کہا گیا کہ وزیراعظم کی ہدایت کے تحت بیرون ملک پھنسے ہوئے پاکستانیوں کی وطن واپسی کے لیے وزارت خارجہ امور کوششیں جاری رکھے گی۔